ಗುರುವಾರದ ಗುರುತು

ಗುರುವಾರದ  ಗುರುತು
ಗುರುರಾಯರ ಆಶೀರ್ವಾದ
ನಮ್ಮ ಪ್ರೀತಿಯ ಸಾಕ್ಷಾತ್ಕಾರ
ನನ್ನ ಕೈಗಿಟ್ಟಳು
ಮುದ್ದು ಬಾಲ ಚಂದಿರ

ಚಂದಿರನಂತೆ ಸುಂದರನಿವನು
ಮೊಲದಂತೆ ಮನೆತುಂಬ ಓಡಾಡುವನು
ಮುಗುಳುನಗೆಯಲ್ಲಿ ಜಗವೇ ಗೆಲ್ಲುವನು
ತೊದಲುನುಡಿಯಲ್ಲಿ ಕಥೆಯೇ ಬರೆಯುವನು
ತನ್ನದೇ ಸಂಗೀತದಲ್ಲಿ ತಲ್ಲೀನಿವನು
ತನ್ನ ನಾಟ್ಯಕ್ಕೆ ತಾನೇ ನಗುವನು

ಅವನ ತು೦ಟಾಟಕೆ ಸೋತು, ಸುಸ್ತಾಗಿ
ಯಾವಾಗ ಮಲಗುವನು ಅಂತ ಕಾಯುವುದು
ಅವನು ಮಲಗಿದಾಗ
ಮತ್ತೆ ಯಾವಾಗ ಏಳುವನು ಅಂತ ಕಾಯುವುದು
ಅವನು ಎದ್ದಾಗ
ಮತ್ತೆ ಹಬ್ಬದ ವಾತಾವರಣ

ಕುಂತಲ್ಲೇ ಕೂಡದವನು
ನಿಂತಲ್ಲೇ ನಿಲ್ಲದವನು
ಕಂಡಲ್ಲೆ ಕಾಣದವನು
ಕ್ಷಣದಲ್ಲೇ ನಗುವನು
ಕ್ಷಣದಲ್ಲೇ ಅಳುವನು
ಮನದಲ್ಲೇ ನೆಲಿಸುವನು